រកឃើញមូលហេតុដែលផ្តើមឲ្យជនសង្ស័យវាយសម្លាប់សិស្សវិទ្យាល័យពងទឹកប្លន់យកទ្រព្យសម្បត្តិហើយ
12-May-2016 | ដោយ មែន កំសត់
ភ្នំពេញ ៖ ជុំវិញករណីប្លន់សម្លាប់យុវសិស្សវិទ្យាល័យពងទឹក ត្រូវបានសមត្ថកិច្ចប្រាប់ឲ្យដឹងថា ផ្តើមឡើងដោយសារជន សង្ស័យជំពាក់លុយគេចំនួន ៧០ដុល្លារ ហើយសុំខ្ចីលុយ ជនរងគ្រោះមិនបាន ទើបឈានដល់ការវាយសម្លាប់ប្លន់ បែបនេះ។ ជនសង្ស័យឈ្មោះ ជុំ វីរៈ ប្រាប់ឲ្យសមត្ថកិច្ចដឹងថា មុនពេលកើតហេតុវេលាម៉ោង៧ ព្រឹកថ្ងៃទី១០ ខែឧសភា ឆ្នាំ២០១៦ រូបគេពុំហ៊ានចូលទៅធ្វើការរោងចក្រនោះទេ ដោយ សាររូបគេបានជំពាក់លុយឈ្មោះ ពេជ្រ ដែលធ្វើការជាមួយគ្នា ចំនួន ៧០ដុល្លារ ហើយរូបគេក៏បានទូរស័ព្ទទៅមិត្តភក្រ័ឈ្មោះ តា និងឈ្មោះ វ័ន្ត នៅបុរីសន្តិភាព២ ។
លុះដល់វេលាម៉ោង ១២ ថ្ងៃដដែល រូបគេក៏បានជិះម៉ូតូ សេ១២៥ ពណ៍ខ្មៅ ស៊េរីឆ្នាំ២០១១ បិទតែមឆ្នាំ២០១៣ ពាក់ស្លាកលេខ ភ្នំពេញ 1AT-5204 ទៅផ្ទះឈ្មោះ តា និងឈ្មោះ វ័ន្ត នៅបុរីសន្តិភាព២ ព្រមទាំងនាំគ្នាទិញស្រា អាឡិចសង់វិស្គី ចំនួន ២ដប កូកាកូឡា ១ដប មី ២កញ្ចប់ ពេលទិញរួចហើយ ពួកគេទាំង ៣នាក់ ក៏បានជិះម៉ូតូឌុបគ្នាទៅផឹកស៊ីនៅទីវាលក្រោមដើមឈើ មួយកន្លែង ស្ថិតក្នុងភូមិព្រៃល្វា សង្កាត់ចោមចៅ ខណ្ឌ ពោធិសែនជ័យ រាជធានីភ្នំពេញ ។
ជនសង្ស័យសារភាពថា ខណៈកំពុងផឹកស៊ី រូបគេ ( ជនដៃដល់) ក៏បាននិយាយដំណើររឿងប្រាប់មិត្តភក្រ័ទាំង ២នាក់ ថា រូបគេជំពាក់លុយគេនៅរោងចក្រចំនួន ៧០ដុល្លារ ដោយមិនដឹងបានលុយមកពីណាយកទៅសងគេ ។ ពាក្យ សំដីនេះមិនត្រូវបានមិត្តភក្រ័ទាំង ២នាក់ ឆ្លើយតបអ្វីឡើយ ភ្លាមនោះរូបគេ ក៏នឹកឃើញប្អូនស្រីជីទួតមួយឈ្មោះ វ៉ុន រដ្ឋា (ជនរងរគ្រោះ) ហើយក៏បានតេទូរស័ព្ទហៅនាង ដើម្បីខ្ចីលុយ តែនារីរងគ្រោះបានឆ្លើយថា រូបនាងកំពុងរៀន ចាំពេល នាងចេញពីរៀន ទើបនាងទៅជួប ។
រហូតដល់វេលាម៉ោង ១៣ និង៣០នាទី ថ្ងៃដដែល ទើបនាងរងគ្រោះ តេទូរស័ព្ទមកវិញថា នាងកំពុងជិះម៉ូតូម្នាក់ឯង មកដល់ចំណុចបុរីសន្តិភាព២ហើយ ដោយឭបែបនេះ ជនសង្ស័យក៏នាំគ្នាឈប់ផឹក ហើយជិះឌុប គ្នាទាំង ៣នាក់ទៅរកនាង ពេលបានជួយនាងហើយ ក៏ ត្រឡប់មកវិញ ដោយរូបគេជិះម៉ូតូរបស់នារីរងគ្រោះ ម៉ាក ហុងដា សេ១២៥ ស៊េរីឆ្នាំ ២០០៧ ពណ៍ខ្មៅ ពាក់ស្លាកលេខ ភ្នំពេញ 1AN-0301ឌុបនាងទៅកាន់កន្លែងផឹកស៊ីដដែលនោះវិញ ហើយពួកគេទាំង ៣នាក់ ក៏បន្តការផឹកស៊ីទៀត ដោយនារីរង គ្រោះមិនបានផឹកស៊ីជាមួយនោះទេ គឺនាងអង្គុយលេងលើតង់ ចាស់ៗដែលគេទុកចោលនៅក្បែរនោះ ។ ខណៈពេលពួកគេ កំពុងអង្គុយផឹកស៊ីនោះ នារីរងគ្រោះបានទារទៅផ្ទះវិញ ភ្លាម នោះរូបគេ ក៏បានយល់ព្រមជិះម៉ូតូឌុបនាងត្រឡប់ទៅវិញ ដោយមិត្តភក្រ័ចំនួន ២នាក់ទៀត ជិះម៉ូតូមកជាមួយតាម ក្រោយ ។
ចម្លើយសារភាពពីជនសង្ស័យបន្តថា ដោយមានចិត្ត លោភលន់ចង់បានទ្រព្យសម្បត្តិផងនោះ រូបគេក៏បានជិះម៉ូតូ ឌុបមកកន្លែងស្ងាត់ (ចំណុចកើតហេតុ) ក៏ធ្វើសកម្មភាពចាប់ ខ្ទប់មាត់នារីរងគ្រោះអូសចូលទៅក្នុងសំណង់បាក់បែក និង រើសដុំឥដ្ឋតាន់វាយក្បាលជនរងគ្រោះ បណ្តាលឲ្យបែក ហូរឈាមរងរបួសធ្ងន់ធ្ងរ ទើបពួកគេស្រវ៉ាយកទូរស័ព្ទដៃ ម៉ាក អាយហ្វូនហ្វាយ ចំនួន ១គ្រឿង និងម៉ូតូជនរងគ្រោះ ម៉ាក ហុងដា សេ១២៥ ស៊េរីឆ្នាំ ២០០៧ ពណ៍ខ្មៅ ពាក់ស្លាកលេខ ភ្នំពេញ 1AN-0301 ជិះគេចខ្លួន ។ ក្រោយពីធ្វើសកម្មភាព បានសម្រេច ពួកគេបានយកម៉ូតូជនរងគ្រោះទៅលាក់ទុក នៅបន្ទប់មិត្តភក្រ័ផ្សេងទៀត នៅភូមិស្លែងរលើង សង្កាត់ទឹកថ្លា ខណ្ឌសែនសុខ ។
ចំណែកទូរស័ព្ទជនរងគ្រោះ ពួកគេបានយក ទៅលក់នៅម្តុំផ្សារទឹកថ្លា បានលុយចំនួន ៧០ដុល្លា ដោយ រូបគេបានទទួលលុយតែចំនួន ៥០ដុល្លារប៉ុណ្ណោះ យកទៅ សងម្ចាស់បំណុល ហើយក្រោយពីសងរួចរាល់ ពួកគេក៏បាន បែកផ្លូវគ្នារៀងៗខ្លួន លុះរហូតដល់យប់ថ្ងៃខែដដែល ក៏ត្រូវ សមត្ថកិច្ចឃាត់ខ្លួនពួកគេជាបន្តបន្ទាប់តែម្តង។ សូមបញ្ជាក់ឲ្យដឹងថា កាលពីវេលាម៉ោង ១៦ និង៥០នាទី សពនារីម្នាក់ត្រូវប្រជាពលរដ្ឋប្រទះឃើញដេកស្លាប់នៅក្នុងថ្លុកឈាម នៅចំណុចក្នុងសំណង់បាក់បែកមួយកន្លែង ស្ថិតក្នុងភូមិព្រៃល្វា សង្កាត់ចោមចៅ ខណ្ឌពោធិសែនជ័យ រាជធានីភ្នំពេញ បង្កការភ្ញាក់ផ្អើលដល់ប្រជាពលរដ្ឋ និងសមត្ថកិច្ចចុះពិនិត្យដល់កន្លែងកើតហេតុ ។
នៅលើខ្លួនសពសមត្ថកិច្ចពិនិត្យឃើញមានកាតសិស្សឈ្មោះ វ៉ុន រដ្ឋា ភេទស្រី អាយុ១៩ ជាសិស្សរៀនថ្នាក់ទី១២D នៃវិទ្យាល័យពងទឹក បច្ចុប្បន្នរស់នៅភូមិព្រៃកីខ សង្កាត់ពងទឹក ខណ្ឌដង្កោ ភ្លាមនោះលោកវរសេនីយ៍ទោ យឹម សារ៉ាន់ អធិការ នៃអធិការដ្ឋាននគរបាលខណ្ឌពោធិសែនជ័យ ក៏បានបើកការ ស្រាវជ្រាវតាមដាន ដោយសហការជាមួយនគរបាលខណ្ឌ ដង្កោ ទើបឈានដល់ការឃាត់ខ្លួនជនសង្ស័យឈ្មោះ ជុំ វីរៈ ភេទប្រុស អាយុ២២ឆ្នាំ មុខរបររោងចក្រកាត់ដេរ បច្ចុប្បន្ន រស់នៅភូមិទ័ព្ធបោះ សង្កាត់ព្រៃវែង ខណ្ឌដង្កោ (ត្រូវជាបង ប្អូនជីទួតមួយជាមួយជនរងគ្រោះ) និងបន្តការឃាត់ខ្លួនជន សង្ស័យចំនួន ៦នាក់ នៅចំណុចផ្ទះជួលភូមិស្លែងរលើង សង្កាត់ទឹកថ្លា ខណ្ឌសែនសុខ ព្រមទាំងដកហូតម៉ូតូចំនួន ២គ្រឿង ក្នុងនោះមាន ១គ្រឿង គឺជាម៉ូតូជនរងគ្រោះ ។
ជនសង្ស័យទាំង៦នាក់ ទី១ឈ្មោះ ហុង សុជោតា ហៅ តា ភេទប្រុស អាយុ២១ឆ្នាំ មុខរបរដេរស្បែកជើង ទី២ ឈ្មោះ លឹម បញ្ញាវ័ន្ត ហៅ វ័ន្ត ភេទប្រុស អាយុ២០ឆ្នាំ ទី៣ឈ្មោះ សុខ សុភាព ហៅ ភាព ភេទប្រុស អាយុ១៨ឆ្នាំ ទី៤ឈ្មោះ សុខ សុភា ហៅ ពីរ ភេទប្រុស អាយុ២២ឆ្នាំ ទី៥ឈ្មោះ ឡេង ដានី ហៅ នី ភេទស្រី អាយុ១៨ឆ្នាំ និងទី៦ឈ្មោះ គ្រឿង ចន្ធូ ភេទស្រី អាយុ១៨ឆ្នាំ ។ បច្ចុប្បន្នជនសង្ស័យទាំង៧នាក់ សមត្ថកិច្ចកំពុង ឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌ ពោធិសែនជ័យ ដើម្បីរង់ចាំកសាងសំណុំរឿងបញ្ជូនទៅកាន់ សាលាដំបូងរាជធានីភ្នំពេញផ្តន្ទាទោសតាមច្បាប់ ៕
ចំនួនអ្នកទស្សនា
- ថ្ងៃនេះ8201
- ម្សិលមិញ20231
- សប្តាហ៍នេះ87281
- ខែនេះ109161
- ឆ្នាំនេះ109161
- សរុប20551617